Еурофарм Пелистер денес во Прешов треба да го завери својот пласман на фајнл-фор завршницата во СЕХА-лига. Битолчани на првиот меч на домашен терен славеа со убедливи 37-29, па оваа разлика треба да биде доволна за остварување на една од трите цели оваа сезона – место меѓу најдобрите четири екипи во регионалното натпреварување.
Иако ракометарите на Пелистер треба да бранат осум гола разлика, сепак се внимателни, знаат дека истата може да биде стопена доколку се опуштат.
Александар Јовиќ
(тренер на Еурофарм Пелистер)
Нè очекува тежок натпревар. Одлучивме да одмориме 3-4 наши ракометари, кои беа преоптеретени во овој дел на нашето првенство и во СЕХА лигата. На овој натпревар ќе им дадеме поголема шанса и на помладите играчи и на оние кои имаа помала минутажа досега.
Марио Танкоски
(РК Еурофарм Пелистер)
Осум разлика носиме во Прешов, но тоа не е ништо. Сигурно Татран ќе биде комплетен во вториот натпревар, во Битола беа преполовени без Рабек и Урбан. Ќе се обидеме да ги одбраниме тие осум разлика за да се пласираме на Ф4, кој сите го посакуваме.
По натпреварот во Прешов ни следи дерби во Автокоманда против Алкалоид. Многу ни е важен тој натпревар, но нема да биде лесно. Мора добро да се спремиме, ако сакаме на седми март против Вардар 1961 во Битола да се бориме за титула.
