Пелистер немаше пријатен почеток на сезоната во СЕХА-лигата, со поразот кај Војводина со 24-29, а сега ќе мора да се поправа на, можеби, уште потежок терен. Утре попладне гостува во Нашице, против екипата на Нексе.
Дуелот го најави тренерот Ларс Валтер и средниот бек Марио Танкоски.
Ларс Валтер
(тренер на РК Еурофарм Пелистер)
Нексе е одличен тим, но видовме дека ја направија истата грешка, како и ние против Војводина. Среде подготовки сме, оставивме неколку ракометари дома за да ги заштедиме, и затоа не изгледавме добро во Нови Сад. Но, сега имаме два дена за подготовка и ќе бидеме подобри. Проблем ни е што немаме многу ракометари тука во Нашице, дојдовме само со четири бека за да покријат шеесет минути, што не е многу. Најголемиот проблем за поразот против Војводина беа техничките грешки кои ги направивме. Ги имавме дури деветнаесет, што не е нормално. Тоа ни се случи бидејќи сме во подготвителен период. Физичките тестови минатата недела беа добри, па сега работиме само на ракомет и треба да се подобриме. Имаме добри шанси да играме израмнет натпревар против Нексе и ќе бидеме подготвени за тој дуел.
Марио Танкоски
(РК Еурофарм Пелистер)
Нексе оваа година игра добар ракомет, први се во групата во Европската лига. Се работи за одлична екипа, но и тие во Нови Сад убедливо загубија и лошо играа, исто како и ние. Овој натпревар и за нас и за нив ќе биде можност за поправање на впечатокот.
По репрезентативни настапи нормално е да има вакви осцилации. Ќе бидеме подобри во следниот период, ни претстои тежок февруари и два натпревари секоја недела. Мора да се подигнеме за да извлечеме убави резултати.
Дуелот меѓу вицешампионите на Хрватска и Македонија се игра в четврток од 18:00 часот.
