Ракометарите на Еурофарм Пелистер денес во 18.45 часот го пречекуваат грчки АЕК со желба за победа која ги носи на второто место во групата во европската лига. Со триумф битолчани ќе го избегнат за противник Магдебург, но мора да бидат внимателни и да избегнат евентуален пораз од три и повеќе разлика, зошто може и да испаднат. За АЕК победата е императив бидејќи ги носи во следната фаза.
„Ова е многу важен натпревар за нас, бидејќи сè ќе се решава во последната рунда од групната фаза. Го анализиравме ривалот, веќе ни е попознат бидејќи одигравме еден натпревар против нив. Се припремавме добро досега, имаме уште два тренинзи до дуелот и мораме да одиме на победа.
АЕК е тактичко добро подготвена екипа, многу се борбени и не се предаваат во ниту еден момент. Имаат голема сплотеност и покажуваат голема борба со многуте искусни играчи. Играат со стил кој ние го анализиравме, не може премногу да се менува од првиот натпревар, како тие, така и ние. Ќе одиме да се надигруваме, па подобриот нека победи.
Напорен период е со многу натпревари. Се обидуваме колку што можеме да се одржиме во најдобра физичка форма. Навистина е тешко и напорно, ама го даваме својот максимум за да бидеме спремни за секој натпревар“, смета Кизиќ.
На првиот натпревар во Атина, Еурофарм Пелистер извојува победа со 27-30.
