Ракометарите на Еурофарм Пелистер утре го играат натпреварот од четвртата рунда во Лигата на Европа.
Во Битола доаѓа незгодната унгарска екипа Татабања, а капитенот Гоце Ојлески вели дека формата на тимот е во нагорна линија и се надева на втор европски триумф. По победата над АЕК, македонскиот вицешампион се надева и на домашна радост.
„Добро се познаваме со Татабања, минатата сезона одигравме неколку натпревари. Со доаѓањето на Ѓукиќ во тимот владее позитивна енергија, играат подобро од претходните и тоа е голем плус за нив. Убаво е кога се победува, особено на гостински терен. Нашата форма оди во нагорна линија, одлично се подготвуваме, играме добро и нема зошто да не веруваме дека ќе победиме на овој меч. Свесни сме дека нè очекува тврд и тежок натпревар, против цврста екипа со добри голмани, но пак ќе речам сите веруваме во победа“, смета Ојлески.
Минатата сезона во истото натпреварување Еурофарм Пелистер запиша двге домашни победи против унгарскиот претставник. Во меѓувреме годинава Владан Матиќ беше сменет по седум успешни години на кормилото на клубот.
