Ракометарите на Еурофарм Пелистер се вратија дома по шест дена минати во Хрватска и Словенија. Жељко Бабиќ е задоволен од трите теста, во кои, иако беше без седуммина ракометари, македонскиот тим добро се претстави. Сите ракометари кои беа на турнејата добија шанса, додадоа минути во нозете и во последните десетина дена во Битола, ќе ги дефинираат последните детали за напорните февруарски обврски.
По повод подготовките, тренерот Бабиќ рече:
„Ракометарите одлично се ангажираа деновиве. Во текот на сите натпревари покажавме задоволителен интензитет. Задоволен сум, иако ни недостасуваше реализација. Очекувам во наредните 10-15 дена да играме во подобра форма. Тоа е очекувано, со оглед на големата пауза. Исто така ни фалат неколку играчи, кои беа дел од репрезентацијата. Верувам дека за првиот дуел во пролетната полусезона во СЕХА лигата ќе бидеме комплетни. Се надевам дека ќе започнеме успешно. Добро се презентиравме на овие натпревари против силни противници.
Одличен потег беше да се дојде тука во Хрватска. Им дадовме шанса на ракометарите кои играа помалку и тие добро се претставија. Посебно, сакам да го потенцирам настапот на Кукуловски. Покажа дека е голем потенцијал и Еурофарм Пелистер заврши голема работа што го доведе во клубот. Очекувам во текот на сезоната да го развие својот потенцијал и еден ден да дојде во македонската репрезентација“.
Ракометарите денес добија слободен ден, а утре пак ќе им се вратат на тренинзите, заедно со македонските репрезентативци кои настапија на Светското првенство.
