Средниот бек Божидар Илиески е нов ракометар на Еурофарм Пелистер 2. Битолчани го промовираа прилепчанецот како нивен играч, а тој ќе има одново шанса да соработува со Бранислав Ангеловски. Илиески е ракометар кој добро ја познава работата на Ангеловски, бидејќи двајцата претходно беа дел од ракометната приказна во Мукти Есенс.
Младиот бек сака повторно да работи со тренерот со кој веќе имал заеднички период во кариерата. Божидар Илиески минатото лето се врати во родниот град и потпиша за Прилеп. Тој пристигна како засилување на бековската позиција, откако претходно настапуваше во Скопје. Во Прилеп доби простор да биде дел од суперлигашки проект што сезонава имаше амбиции за стабилизација и чекор кон горниот дел од табелата.
Подготовките за новата сезона Еурофарм Пелистер 2 ќе ги започне кон крајот на овој месец.
