Еурофарм Пелистер издвојува голема победа над ГРК Охрид од 22-25 (10-16) во дерби средбата од 9. коло од плеј-офот во Суперлигата. Со оваа победа тимот на Алексо Лембанов сам од себе зависи за освојување на второто место и пласман во Европската лига на ЕХФ.
Ова беше исклучително важен меч за двете екипи, директна битка за второто место на табелата и битка во која подобро се снајдоа гостите од Битола и ја освоја салата „Билјанини Извори“.
Ланскиот шампион има квалитетно прво полувреме во кое го неутрализираше домаќинот и на одмор однесе +6, предност која се покажа како недостижна за „гладијаторите“ во вториот дел. Охрид имаше сериозен проблем со реализацијата, немаше решение за расположениот Никола Митревски и предноста продолжи да расте. Со двата врзани гола на Хосни и Атанасијевиќ стигнаа до 6-12. Охриѓани се мачеа и до 28. минута имаа само седум постигнати гола, а на одмор се замина со 10-16.
Битолчани продолија во ист ритам и на стартот од второто полувреме, поведувајќи со преубедливи 12-20 по погодоците на Кузмановски и на Радивојевиќ. Охрид се приближи на 17-21, но пелистерци искусно го приведоа мечот до крај и заслужено се радуваа на големата победа.
Еурофарм Пелистер го имаше супер расположениот Митревски со дваесет одбрани, додека Радивојевиќ даде девет погодоци.
Ракомет
Суперлига 2025/26
Плеј-оф - деветто коло
Охрид - Еурофарм Пелистер 22-25 (10-16)
Спортска сала „Билјанини извори“ - Охрид
Гледачи: 2.000
Судии: Димитар Митревски и Благојче Тодоровски
Охрид:
Блажевски, Пилипович, Стрмљан 1, Ојлески 3, Јагуриновски 1, Иванковиќ 2, Јасихура 5, Ристески, Тасески, Моралес, Савревски 1, Лиапис 2, Ѓукиќ 3, Ќосевски, Прибетиќ 4
Седмерци: 4/4
Исклучувања: 2 минути
Еурофарм Пелистер:
Митревски, Хаидарирад, Манасков 3, Видомски 1, Ристевски 1, Тајник, Граховац, Хенигман 1, Радивојевиќ 9, Кузмановски 4, Абутовиќ, Калајџиовски, Пет. Атанасијевиќ 2, Пешевски 1, Хосни 2, Пав. Атанасијевиќ 1
Седмерци: 7/5
Исклучувања: 6 минути
Во последното десетто коло од плеј-офот Еурофарм Пелистер го пречекува Алкалоид следниот четврток од 18:00 часот.
