Ден по натпреварот против Алкалоид, ракометарите на Еурофарм Пелистер добија слободен ден, а стручниот штаб веднаш започна со подготовка на следниот натпревар. Пред заминувањето за Германија и натпреварот против Фуксе Берлин пред новинарите зборуваа тренерот Раул Алонсо и бекот Павле Атанасијевиќ.
Раул Алонсо
(тренер на Еурофарм Пелистер)
Февруари е брутален, но така е за сите екипи. Фуксе Берлин го има истиот проблем со заморот како и ние. Тие пред неколку дена играа со Флензбург во Бунделсигата. Навистина играат добро. Сепак, навикнати сме, малку имаме време да уживаме по одличниот домашен натпревар вчера и среќен сум што напорната работа се исплатува. Секој трет ден играме натпревар, сега патуваме за Германија, ни следи натпревар со врвна екипа и светска класа на ракометари. Наша цел ни е да одиграме на највисоко ниво во Берлин. Завршивме одлична работа во последните неколку месеци, освоивме многу бодови и достигнавме ниво да се натпреваруваме на високо ниво на домашен терен и сега предизвик е да се покажеме така добро во гости. Има полесни натпревари од овој во Берлин, но кога играте во Лигата на шампионите секој натпревар е тежок.
Го познавам Фуксе Берлин многу добро. Скоро дваесет години го градат овој проект на паметен начин. Секогаш имале врвна екипа, пред неколку години играат Ф4 на Лигата на шампионите и сега се во момент кога се борат за трофеите во Германија и целат кон учество на завршниот турнир во Европа. Потпишаа некои врвни ракометари, го имаат најдобриот светски ракометар, го продолжија договорот со него и не е коинциденција што се толку добро. Во состојба се да се натпреваруваат за сите трофеи. Ќе биде тешко да се игра против нив, но треба да се концентрираме на нашата игра и да одиграме на ниво.
Павле Атанасијевиќ
(РК Еурофарм Пелистер)
Имаме тежок распоред и немаме ден за одмор. Сепак, од прв до последен даваме максимум. Доаѓа Фуксе Берлин и пак ќе бидеме на висината на задачата. Тие се одлична екипа, имаат светски ѕвезди и одиме во Берлин да се обидеме да победиме. Тренерот ќе постави тактика во одбраната и нападот и мислам дека ќе одиграме на ниво. Не се откажуваме, играме до последна минута и тоа е карактеристика која нè краси. Никој не може лесно да нè победи. Сите сме мотивирани, нешто посебно игра во нашите тела и нема замар. Одиме чекор по чекор. Прво Фуксе Берлин, па потоа ПСЖ.
Најубаво е да се игра пред македонски навивачи. Атмосферата која вчера ја приредија „Чкембарите“ и битолчани едноставно те понесува. Убаво е тоа чувство.
ЕХФ веќе ги делегираше официјалните лица за оваа средба. На натпреварот во германската престолнина ќе судат Ларс Јорум и Хавард Клевен од Норвешка, додека делегат ќе биде Николае Визитиу од Молдавија.
