На неколку дена до почетокот на новата ВИП Супер лига, екипата на Еурофарм Работник донесе големо засилување во името на 24-годишниот повремен репрезентативец на Португалија, Серџо Енрике Монтеиро де Барош.
Брзото крило доаѓа од Спортинг Лисабон и денес беше претставен со дресот со број седум. Барош потпиша до крајот на сезоната и ќе биде од голема помош за екипата на Марковски и Зарков.
„Задоволен сум што дојдов во ракометна земја како Македонија. Тука ракометот се сака со голема пасија и верувам дека добро избрав. Запознав ракометни луѓе, ја познавам и екипата и едвај чекам да почне шампионатот“, рече на претставувањето Серџо Барош.
Португалецот настапи на еден натпревар на струшкиот турнир, а денес ќе биде дел од контролниот натпревар на Еурофарм Работник против Вардар Јуниор во спортската сала „Младост“. Неговиот прв официјален натпревар се очекува на 17 септември против Пелистер.