Тренерот на ракометарите на Еурофарм Пелистер, Жељко Бабиќ, очекува тежок меч со Татран Прешов во третото коло во регионалната СЕХА лига. Средбата ќе биде одиграна утре во Битола од 17:45 часот.
На денешната средба со новинарите тренерот на битолчани искажа зборови за респект кон Голужа и словачкиот шампион.
„Татран Прешов е добро тренирана и добро водена екипа од поранешниот хрватски селектор, кој долго време е таму, што значи дека добро си ја работи својата работа. Во тоа не треба воопшто да се сомнева. Имаат добра транзиција и контра напад и многу добар посед на топка во напад. Тоа веќе им го нагласив на моите ракометари. Единствен начин ако сакаме да победиме е агресивна одбрана, посебно во средината, и враќање во одбрана. Натпреварот бара голем респект и ни следи тежок дуел“, смета хрватскиот стручњак.
Досега во А групата на СЕХА лигата, Еурофарм Пелистер запиша една победа и еден пораз. Покрај овие две екипи, во оваа група се уште српската Металопластија и хрватскиот ППД Загреб.
