Дебито во Лигата на шампионите за Еурофарм Работник мина во знакот на драматично надигрување со португалскиот Спортинг. На крајот гостите извојуваа победа од 29-30, а битолчани жалат што не откинаа барем бод. На прес-конференцијата зборуваа тренерот Стевче Алушовски и хрватскиот интернационалец Ловро Јотиќ.
Стевче Алушовски
(тренер на Еурофарм Работник)
Им честитам на ракометарите на Спортинг за добрата игра и заслужените два бода. Кога играте на ова ниво во Лигата на шампионите морате да имате повеќе идеја во нападот и поголема безобразност. Разликата ја гледам во играта во одбраната и во контрите и полуконтрите. Некои договорени работи не ги испочитувавме во играта во одбрана. Ни останува да работиме за да стигнеме до првата победа во Лигата на шампионите. За жал за нас дебито во Лигата на шампионите заврши со пораз.
Ловро Јотиќ
(ракометар на Еурофарм Работник)
Жал ни е што не успеавме да го донесеме до победа натпреварот против Спортинг. Во второто полувреме направивме неколку технички грешки, а не ги искористивме и можностите со играч повеќе. Моите соиграчи денеска дадоа максимум и им честитам. Публиката нè бодреше максимално и благодарен сум им. Не чека гостување во Шведска и сметам дека што побрзо треба да го заборавиме овој натпревар и да се насочиме кон новиот натпревар.
