Тренерот на Татабања, Драган Ѓукиќ беше крајно разочаран на крајот од дуелот меѓу Еурофарм Пелистер и Татабања, на кој неговиот тим претрпе убедлив пораз во Битола (33-20).
Српскиот стручњак му ја честиташе заслужената победа на битолскиот состав, свесен дека по денешното фијаско ќе има полни раце работа за да го врати победничкиот дух во својот тим.
„Еурофарм Пелистер беше подобар во секој аспект на играта. Начинот на кој играа одбрана и напад беше премногу за нас на денешниот дуел. Мала неизвесност имаше само десетина минути, а остатокот од натпреварот помина во доминација на домаќинот. Ја преземам одговорноста и во наредните неколку дена ќе анализирам што се случи. До крајот остануваат многу бодови, ова е тежок пораз, но не се откажуваме“, заврши поранешниот македонски селектор.
Унгарскиот претставник има една победа и три порази и со Кадетен Шафхаузен го зазема последното место во групата Д на ЕХФ Лига Европа.
